EIN HYSGOL

Plant llawen a llwyddiannus

Croeso i wefan ein hysgol, gobeithio y bydd yn rhoi rhagflas i chi o’r hyn rydym yn ei gynnig yma yn Ysgol Pennal. Lleolir Ysgol Pennal ym mhentref Pennal. Rydym yn gymuned ysgol hapus sy’n cynnig croeso cynnes i bob unigolyn. Rydym yn darparu amgylchedd diogel ac ysbrydoledig gyda safonau addysgu a dysgu uchel.

Mae Ysgol Pennal yn un o ddwy ysgol o fewn Ffederasiwn Ysgol Dyffryn Dulas ac Ysgol Pennal. Cymraeg yw prif gyfrwng gwaith a bywyd yr ysgol ond anelir at sicrhau bod y disgyblion yn gwbl ddwyieithog erbyn iddynt drosglwyddo i’r sector uwchradd. Mae’r ffederasiwn yn rhannu un pennaeth ac un corff llywodraethol ac yn sicrhau bod pob un o’r ddwy ysgol yn cadw eu hunaniaeth unigol eu hunain.

Ein nod yw darparu awyrgylch hapus a chysurus ar gyfer eich plentyn er mwyn hybu datblygiad ysbrydol, moesol, diwylliannol a chorfforol. Ein bwriad yw cyflwyno amrywiaeth eang o weithgareddau addysgol cytbwys ar gyfer yr holl blant er mwyn eu galluogi i ddatblygu’n ddysgwyr uchelgeisiol, mentrus, annibynnol ac iach.

Gwerthfawrogwn y bartneriaeth gref gyda rhieni a’r gymuned. Ein bwriad yw rhoi cychwyn hapus i bob plentyn ar eu taith addysgol gan sicrhau eu bod yn gadael Ysgol Pennal yn unigolyn hyderus sy’n credu ynddynt eu hunain ac yn dangos parch ag empathi at eraill.

Mae croeso i chi gysylltu â’r ysgol gydag unrhyw ymholiadau sydd gennych.